因為節目【蝦米再教育團】第二集入面體驗小六學生，我輸咗，我冇資格做一個小六學生，而個懲罰就係要出一個 300 字嘅Post
【體驗小六學生之我見】
我係到諗一樣嘢，讀書時所學習嘅東西，如果到咗大個係冇用嘅，或者係好少用嘅，或者係會還返俾晒老師嘅，或者再直接啲係搵唔到錢嘅，咁學嚟係唔係冇用呢？
我唔認同的，雖然望返轉頭，大部份人都會覺得讀書嘅科目對於出嚟做嘢冇咩實際作用，但係又咁講，你細個邊到識諗咁多嘢，你除咗識玩，同讀書，你又點會知道原來我第時想做某種職業，等我宜家就即刻去學嗰樣嘢先。
你可以話個教學制度唔好，教學內容唔好，但所學嘅嘢對將來有冇用呢，其實都真係冇人決定到，話唔定你第時做嗰樣嘢，就係你讀嗰科呢。
當然啦，事實係大部份人都係讀完嗰科，出嚟做嘢都用唔著，咁咪當上咗人生一課囉，因為呢個世界仲有好多嘢你都會係做完之後，冇咩作為的。
讀書，你讀到，固然係好，如果你對讀書或學習呢件事，
係好有興趣嘅話，好上加好。
但如果冇興趣讀，都冇計，迫唔到，睇吓有冇得盡力做到個合格分，叫做對升學有啲幫助先，雖則話求學不是求分數，但你要知道，呢個世界都係要睇分數的，睇完分數先睇你個人，係唔健康㗎，但個世界係咁玩，你冇分數，冇人會想睇你係一個咩人，大部份時間啦，總有例外嘅（廢話）
不過你望吓我，冇咩分數，到宜家都冇穿冇爛，然後睇吓好唔好彩，搵到你感興之事，做好佢，搵唔到，都唔緊要啦，世界咁大，總有樣嘢令你開心，就算你日日係屋企打機又如何，開心就得，因為到大個你會發現，開心其實好難。
仲有，做人切忌心地唔好，心地唔好呢，就會…就會點呢？
-
【蝦米再教育團】第二集: 學生哥功課之旅 - 小三英文搞到蝦米頭都暈😰
https://www.facebook.com/ArmChannelTV/videos/318057042794034
Search